Bak bøkene: Live Bonnevie

Brakdebut med hestebok!

Då Live Bonnevie skulle skriva si første bok, gjorde ho noko lurt. Ho skreiv rett og slett om noko som ho hadde god greie på. Bonnevie har drive med hest i over tretti år, og hadde ei nesten utømmelig kjelde å ausa frå då ho skreiv romanen Hestenes klan. Boka er no ute i sitt femte opplag, så ein kan trygt kalla det ein brakdebut!

Lives tips til ei kvar forfattarspire, er å nettopp bruka noko du er ekspert i ditt første bokprosjekt.

Noko å tenka på: Viss du skulle følgja Live sitt råd, kva ville i så fall di første bok handla om?

Men det å kjenna stoffet sitt godt har også ei bakside, Live Bonnevie opplevde at det var vanskelig å avgrensa stoffet. Det var så mykje ho ville fortelja. Heldigvis så er jo muligheten der til å skriva fleire bøker, noko ho alt er godt i gang med.

Hestenes klan er ei hestebok utanom det vanlige, den engasjerer og er spanande også for dei som ikkje synest hest er best. Boka fekk mykje merksemd då den kom ut.

Dette skreiv kritikar Guri Fjeldberg om Hestenes klan i Bergens Tidende: "Med denne blandingen av spenning, hestekunnskap, kvinnelig urkraft og refleksjon om oppdragelse, lykkes Bonnevie i å utfordre sjangeren hestebok. Endelig!" og her kan du lesa kva andre har meint om boka.

Viss du vil vita mi meining, så er det: Ei bok som er perfekt til å ta med på ferie! To dagar med regn vil garantert fly av garde i selskap med Hestenes klan.

Live Bonnevie har bakgrunn frå filmbransjen, og det var derfor naturlig å laga ein trailer for boka. Den er ganske så imponerande og flott, synest eg!

Og likte du denne, så sjekk også ut kinoreklamen for boka!

Les meir om Live Bonnevie og debutboka hennar på bloggen hestenesklan.no.

Neste veke er det klart for siste gjest før ingelin.no tek sommarferie. Det er ein allsidig forfattar som kunne hatt ”Noko for alle” som slagord. Han er i år festivalforfattar under dei nynorske festspela , og då burde det vera lett å finna ut kven det er snakk om…