Arbeidsstova: Sweet deadline!

På eit tidspunkt må grubleria på det perfekte plott slutta, og det som må til er å gi gass. Du må faktisk setta deg ned og skriva den der boka, ord for ord. No er eg så heldig å ha eit forlag og ein redaktør, som held meg ganske stramt i nakken og gir meg deadline. Men viss du ikkje har nokon redaktør, så må du gi deg sjølv ein tidsfrist og gjerne fortelja det til ein venn som kan passa på at du held tida. At du faktisk fullfører.

Din nye venn: eggeuret!

Det å setta på ein alarm på telefonen eller å bruka eit god gammaldags eggeur er som sagt mitt beste tips. (Dei fargeglade dingsane på bilete er forresten frå Jysk viss du kjente at du fekk lyst på eit sånt eggeur.) Eg har lese ein plass at 45 minutt er perfekt, det er omtrent så lenge ein klarar å konsentrera seg om gangen. No kan det sjølvsagt henda at du vil oppleva å koma i flyt. Det vil seia at dei 45 minutta fyk av garde og at du ikkje har lyst å ta pause. Vel, då er det berre til å flyta vidare i skrivinga. Tidtakaruret er mest meint for å gi deg det der vesle puffet.

Trenar

Redaktøren på forlaget er på mange måtar min personlige trenar i skrivinga. Ho heiar på meg under vegs, kjem med gode tips men set også strenge krav. "75 sider til 8. desember", har redaktør-Kjersti sagt. Då er det berre for meg å levera. Viss du ikkje har ein redaktør enno, så kan du skaffa same gode støtte frå ein venn. Fortel at du er i gang med å skriva ei bok, set deg eit realistisk mål og be om muntre tilrop på vegen. Pass på at det er nokon som er passe streng og som vil deg vel.

"Eit mål er ein draum med ein deadline"

Napoleon Hill

Realistiske mål er viktig. Med det meiner eg ikkje at du ikkje skal utfordra deg sjølv, men at du skal setta deg mål som du verkelig trur du kan nå. Kor mange sider trur du at du greier for dagen, i veka, i månaden? Viss du delar skrivinga opp i etappar blir det også enklare. Å skriva bok kan på mange måtar minna om å legga opp ei fjellvandring eller å springa maraton. Du kan planlegga til du blir blå i trynet, men når alt kjem til alt så er det berre om du gjennomfører eller ikkje som tel.

Viss du har andre gode tips for å få fart på skrivinga så blir eg hjartans takknemlig. Eg har som sagt snart deadline, og tek i mot alle puff i ryggen med den største takk!

Arbeidsstova: Kva kan Steve Jobs læra deg om skriving (og livet)?

Svar: Ein heil del!

Ta deg tid til å sjå denne:

For det første: Talen har ein bra struktur, berre det er ei glede. Legg merke korleis han i starten seier at han har tre historier.

For det andre: Du må elska det du gjer. Dette gjeld for alt i livet. Også skriving. Du må skriva av kjærleik, skriva så hjarta blør. Eg skal ikkje stikka under ein stol at det også er gøy å tena pengar på å skriva, men pengar er ei følgje av min kjærleik for å skriva. Bøkene mine kjem ikkje som ei følgje av kjærleik til pengar.

Ein god venn av meg, Gunnar Ardelius, sa ein gong at det finns hjartebøker og hjernebøker. Bøker skrive frå hjarta er meir ekte, spør du meg. Det er noko tørt over bøker der forfattaren prøver å vera vittig, skarp og visa kor mange bøker og litterære referansar ho eller han har.

For det tredje: Motgang. Det er motgang som gjer deg sterkare, heilt sant. Du kjem til å tryna, men det viktigaste er at du reiser deg igjen og igjen og igjen. Når livet går meg i mot, seier eg til meg sjølv: Godt at mitt største talent er å reisa meg igjen. Så viss nokon seier til deg at du ikkje kan skriva den boka du drøymer om? Bit tennene saman og vis dei gjennom handling at det kan du. Dei som "dissar deg" er dine hemmelige hjelparar.

Steve Jobs:

Steven Paul Jobs født 24. februar 1955 i San Francisco i USA, død 5. oktober 2011 var grunnleggjar, styreleiar og tidligare administrerande direktør for Apple.

Som han kanskje sjølv ville sagt i dag: iRip

PS: Er du meir nyfiken på Steve Jobs, så kan du lesa den autoiserte biografien om han som kjem ut på norsk i november på Cappelen Damm. Meir om biografien hos Bok og samfunn.